Жорий йил касаба уюшмалари ҳаракати учун тарихий аҳамиятга эга бўлиб, 2025 йилда унинг 120 йиллиги кенг нишонланмоқда. Шу муносабат билан Ўзбекистон касаба уюшмалари Федерацияси томонидан махсус чора-тадбирлар режаси ишлаб чиқилди. Шунга мувофиқ касаба уюшмаларининг барча даражадаги ташкилотларида “Касаба уюшмалари ҳафталиги”ни юқори савияда ташкил этиш ишлари амалга оширилди. Тадбирлар жамоатчиликни фаол жалб этган ҳолда, фаолиятнинг юксак руҳда ўтиши таъминланди.
Айтиб ўтиш жоизки, айнан шу йилда касаба уюшмалари ташкилотларининг ортда қолган беш йиллик фаолиятини якунлаш, амалга оширилган ишлар юзасидан ҳисобот бериш ҳамда келгуси беш йил учун устувор вазифаларни белгилаб олиш мақсадида ҳисобот-сайлов йиғилишларини ўтказиш тўғри келди. Мазкур йиғилишлар давомида ташкилотларнинг ижтимоий-иқтисодий соҳалардаги иштироки, ходимлар манфаатларини ҳимоя қилиш бўйича кўрилган чора-тадбирлар, жамоа шартномаларининг ижроси ҳамда касаба уюшмалари фаолиятининг бошқа муҳим йўналишлари атрофлича таҳлил қилиниб, тегишли хулосалар чиқарилмоқда.
Касаба уюшмалари Федерацияси Бош Кенгашининг 2024 йил 24 декабрь ойидаги тегишли қарорига мувофиқ, 2025 йилда Ўзбекистон касаба уюшмаларидаги ҳисобот сайловлари кампанияси бошланган. Компания доирасида, жорий йилнинг 9 август куни, касаба уюшмалари Федерациясининг “Малака ошириш” институти ўқув марказида, Ўзбекистон Тадбиркорлик, бизнес ва хизмат кўрсатиш сохалари ходимлари касаба уюшмасининг V Қурултойи бўлиб ўтди.
Қурултой ишида тармоқ касаба уюшмасининг Қорақалпоғистон Республикаси, вилоятлар, Тошкент шаҳри конференцияларида сайланган делегатлар, Ўзбекистон касаба уюшмалари Федерацияси раҳбарияти, ҳамкор ижтимоий шерик ташкилотлар – Ўзбекистон Савдо-саноат палатаси, Ўзбекистон “Ўзчармсаноат”, “Ўзтўқимачи-ликсаноат”, “Ҳунарманд” уюшмалари, “Ўзбекистон Истеъмолчилар ҳуқуқларини ҳимоя қилиш жамиятлари Федерацияси”, Ўзбекистон Республикаси “Кўзи ожизлар” ва “Карлар” жамиятлари Марказий бошқарувлари, йирик компаниялар ва ташкилотлар раҳбарлари, шунингдек, таклиф этилган меҳнат фахрийлари ва мехмонлар иштирок этишди.
Тармоқ касаба уюшмаси амалга оширилган кенг кўламдаги ишлар натижасида тизимдаги бошланғич ташкилотлар сони 2020 йилдаги 2 611 тадан 2025 йилга келиб 3 261 тагача, аъзолар сони эса, 274 минг 795 тадан, 602 минг 086 нафаргача кўпайиб, аъзолар сони
5 йил мобайнида 2 баробарга ортди.
Ҳисобот даврида касаба уюшмасидаги ўзгаришлар ҳудудий касаба уюшмаси ташкилотларининг бошқарув самарадорлигини ошириш, ресурсларни марказлаштириш ва тизимни замонавий талабларга мослаштиришга қаратилди. Шунга мувофиқ, ҳисобот даврида ҳудудий бирлашган қўмиталарни ҳар томонлама қўллаб-қувватланиб, уларнинг молиявий барқарорлиги таъминланиб, кадрлар салоҳиятини кучайтиришга аълоҳида эътибор қаратилди.
V Қурултойда Ўзбекистон Тадбиркорлик, бизнес ва хизмат кўрсатиш сохалари ходимлари касаба уюшмасининг 2021-2025 йиллардаги фаолияти сарҳисоб қилинди хамда касаба уюшмаси Тафтиш комиссияси хисоботи эшитилиб, ушбу икки масала натижалари бўйича Қурултой делегатлари касаба уюшмаси Республика Кенгаши фаолиятини қониқарли деб баҳоладилар.
Шу билан бирга касаба уюшмасининг Уставига киритилган қўшимча ва ўзгартиришлар қабул қилиниб, келгусидаги Устувор вазифалар ҳамда 2025-2030 йилларга мўлжалланган Стратегияси маъқулланди.
Мазкур хужжатда халқаро меҳнат ташкилотининг конвен-циялари, янги таҳрирдаги Меҳнат кодекси, гендер аудитни ўтказиш, юридик шахс мақомига эга бўлмаган касаба уюшмалари ташкилотларини ҳисобга қўйиш борасидаги касаба уюшмаси фаолиятини янада такомиллаштириш режалаштирилган бўлиб, жамоа шартномалари ва ижтимоий шерикликни мустаҳкамлаш, меҳнат муҳофазаси ва назоратини кучайтириш, касаба уюшмаси аъзолари сафини кенгайтириш, аёллар ва ёшлар учун махсус ташаббуслар жорий этиш, хусусий секторда меҳнат ҳуқуқларини кафолатлаш, фуқароларни соғломлаштириш ва самарали дам олишини ташкил этиш ҳамда халқаро тажриба ва норма ижодкор-лигида фаол иштирок этиш мақсад қилиб олинган.
Анжуман давомида кун тартибидаги қатор масалалар муҳокама қилинди ва Тадбиркорлик, бизнес ва хизмат кўрсатиш соҳалари ходимлари Республика Кенгаши рахбарияти, касаба уюшмаси Тафтиш комиссияси янги таркиби, касаба уюшмаси ижрочи органлари аъзолари, касаба уюшмалари Федерацияси Бош Кенгашига вакиллар хамда Федерациянинг IX Қурултойига делегатлар сайлаб олинди.
Тармоқ касаба уюшмаси Қурултойи кўтаринки руҳ ва қизғин музокаралар билан бўлиб ўтди.
